Kusang lumapit ang grupo ng Senior Citizens sa Social Security System (SSS) upang ilahad ang kinakaharap nilang suliranin at malaman kung paano sila matutulungan ng SSS. Sa gitna ng huntahan at palitan ng kuro-kuro, naihayag ng mga Senior Citizens ang kanilang problema sa naglipanang “loan sharks”.
Hindi maikakaila na ilan sa ating mga lolo at lola ay nagkakaroon ng biglaang pangangailangang pinansyal. Sa ganitong mga pagkakataon, nagiging takbuhan nila ang private lending institutions na nagpapa-utang ng napakalaking halaga subalit binabawi naman sa napakalaking interes. Idagdag pa ang kanilang patakaran na kung saan kinukuha nila ang ATM card ng pensyonado bilang kolateral. Sa isang banda, hindi naman natin masisisi ang private lending institutions dahil kailangan nilang maniguro sa pagpapatakbo ng negosyo sa pamamagitan ng pagsunod sa itinakdang mga patakaran o tinatawag na internal guidelines.
Subalit, bilang isang ahensiya ng gobyerno na nagpoprotekta sa kapakanan ng mga pensyonado, minabuti ng SSS na maglunsad ng SSS Pension Loan Program na may mas mababang interes, mas maluwag na proseso ng aplikasyon, at hindi kinakailangan ng anumang kolateral.
Ang halaga na pwedeng mautang ng kwalipikadong pensyonado ay katumbas ng dalawang buwang pensyon hanggang anim na buwang pension basta’t ito ay hindi hihigit sa P32,000. Maari itong bayaran mula tatlo, anim o hanggang 12 buwan depende sa halaga ng utang at ibabawas ito sa kanilang buwanang pension. Sampung porsyento lang kada taon ang interest rate nito hanggang matapos itong bayaran at kasama na rin ito sa buwanang hulog ng utang.
Sisimulan ang pagbabayad sa pension loan sa ikalawang buwan mula nang matanggap ito. Halimbawa, kung natanggap nina lolo at lola ang inutang noong Enero, ibabawas ang unang hulog sa pensyon sa buwan ng Marso.
Tinanong ako ng nakilala kong lolo na SSS pensioner kung ano ang mangyayari sa kanyang inutang sakaling mamatay siya habang binabayaran ang loan. Interesado kasi si tatay na umutang sa SSS.
Ang maganda sa Pension Loan, may kaakibat na Credit Life Insurance ang SSS. Ibig sabihin nito, ang Credit Life Insurance na mismo ang magpapatuloy sa pagbabayad ng naiwang utang kung sakaling mamatay ang pensyonado.
Ipinaalala ko rin kay lolo na hindi kukunin ng SSS ang kanyang ATM card bilang kolateral dahil kahit may inutang siya at binabayaran niya ito buwan-buwan, may matatanggap pa rin siyang pensyon. Kung katumbas ng tatlong buwang pensyon ang kanyang inutang, higit 32 porsyento ng kabuuang buwanang pensyon ang maiuuwi ni lolo. Kapag anim na buwang pensyon naman ang kanyang inutang, higit 31 porsyento ng kabuuang buwanang pensyon ang matatanggap ni lolo. Samantala, halos kalahati ng buwanang pensyon ang maiuuwi ni lolo kung katumbas ng 12 buwang pension ang kanyang inutang. Sa madaling sabi, hindi sila mawawalan ng buwanang ayuda mula sa SSS habang nagbabayad pa sila ng utang.
Maaaring mag-apply sa PLP ang mga retiradong pensyonado na 80 anyos pababa sa huling buwan ng termino ng utang; walang utang at benefit overpayment na kailangang bayaran sa SSS; at walang paunang pensyon sa ilalim ng SSS Calamity Package.
Pwede rin mag-apply sa PLP ang retiree pensioners na isang buwan pa lamang nakakatanggap ng pensyon. Dapat lamang ay nakapost na ito sa system ng SSS.
Kung sakaling walang Unified Multipurpose Identification Card o UMID ang pensioner, maaari na rin niya iprisinta ang ibang Identification Cards (IDs) at opisyal na dokumento gaya ng Alien Certificate of Registration mula sa Bureau of Immigration; Driver’s License mula sa Land Transportation Office; Firearm Registration, License to Own and Process Firearms at Permit to Carry Firearms Outside of Residence mula sa Philippine National Police; NBI Clearance; Pasaporte; Postal ID; Seafarer’s ID o Seaman’s Book; at Voter’s ID Card.
Sa mga SSS pensioners na nais mag-avail ng Pension Loan, bisitahin lamang ang pinakamalapit na SSS branch sa inyong lugar.
===
Nakarating sa kaalaman ng SSS na may mga indibidwal o grupo na nag-aalok na palitan ang inyong SSS Pension Loan ng “instant cash” pero may bawas na malaki at kailangan pa i-surrender ang inyong “Cash Card”. Huwag po kayo kumagat sa bagong modus ng fixers. Kagaya ng nabanggit ko, limang araw lang ang processing ng SSS Pension Loan at siguradong buo niyong matatanggap ang inutang niyo sa SSS. Kung may alam kayong mga indibidwal o grupo na sa tingin ninyo ay nananamantala sa ating mga SSS pensioners, i-report agad ito sa pinakamalapit na sangay ng SSS sa inyong lugar.
Inilunsad ang programang ito para makinabang ang mga pensyonado at hindi ang mga mapagsamantalang fixers na nasisikmurang manloko ng mga matatanda kapalit ng malaking halaga. Sana naman ay maghanap kayo ng marangal na trabaho at hayaan niyo ang mga pensyonado na mapakinabangan nang husto ang benepisyong nararapat sa kanila.
====
Nais naming ipaalam sa aming mga miyembro na ang Loan Restructuring Program ay bukas hanggang ika-1 ng Abril 2019. Sa LRP, pinagaan ang pagbabayad ng mga loan balance ng aming mga miyembro. Inaanyayahan namin ang aming mga pensiyonado o miyembro na nais mag-avail ng alinman sa dalawang programang ito, na magsadya sa pinakamalapit na tanggapan ng SSS sa kanilang lugar.
====
Para sa anumang suhestiyon, opinyon at iba pang katanungan tungkol sa inyong SSS membership, ipadala lamang sa aking e-mail address sa rillortac@sss.gov.ph at susubukan nating pag-usapan yan sa ating susunod na column.